Grein þessi birtist á prenti á bls. 6 í 22. tbl. Feykis, þann 2. júní sl. Í greininni er sleginn botninn í umfjöllun um sögu íþróttakeppninnar, heimsleikanna og kennslu í hestamennsku. Jafnframt er nú venju samkvæmt tekið tveggja mánaða sumarhlé í birtingu greina frá Sögusetrinu í Feyki. Í fyrsta tölublaði Feykis í september næstkomandi verður hafin umfjöllun um sögu hrossakynbóta á Íslandi.
Myndin sem greininni fylgir er merkileg fyrir margra hluta sakir. Hún birtist áður í bókinni Íslenski hesturinn sem út kom árið 2004 í ritstjórn Gísla B. Björnssonar og Hjalta Jóns Sveinssonar. Útgefendur voru MM og SÍH, myndina tók Anna Fjóla Gísladóttir. Á myndinni sem tekin var í júlí 2002 eru þau Anna Bretaprinsessa og Eyjólfur Ísólfsson tamningameistari og þáverandi yfirreiðkennari á Hólum í útreiðatúr í Hjaltadal en hún heiðraði þá LM sem fram fór á Vindheimamelum með nærveru sinni. En sem kunnugt er þá er Anna prinsessa mikil hestakona og mætti jafnframt sem fulltrúi FEI, sem eru heimssamtök hestamennskunnar, í heimsókninni fólst mikil viðurkenning fyrir íslenska hestinn og íslenska hestamennsku.
