03.06.2025
Kristín, Bjarni, Olil og Brynja.
Sögusetur íslenska hestsins opnaði með pompi og prakti sunnudaginn 1. júní með opnunarhátíð nýrrar sýningar „Hesturinn okkar: Litbrigði, ættir og saga“ á efri hæð setursins. Þar má m.a. virða fyrir sér fróðleik um litaerfðir íslenska hestsins, ýmsa gripi tengdum merkum hestum og mönnum og skella sér í "reiðtúr" með sýndarveruleikagleraugum frá Horses of Iceland.
Kristín Halldórsdóttir, verkefnastjóri setursins og hönnuður hinnar nýju sýningar flutti ræðu í tilefni opnunarinnar. Þá tóku fleiri til máls, m.a. Hólmfríður Sveinsdóttir rektor Háskólans á Hólum þar sem hún kom inn á mikilvægi setursins fyrir Hólastað.
Þá voru setrinu færðar margar gjafir. Olil Amble færði setrinu að gjöf málverk af Álfadísi frá Selfossi, eftir Jósefínu Morell, ásamt ljóði um sögu Álfadísar eftir Fanneyju Hrund Hilmarsdóttur. Þá lánaði Olil og fjölskylda setrinu listaverk eftir Lenu Zachariassen á Hjalteyri unnið m.a. úr taglhárum úr Álfadísi. Magnús Einarsson í Kjarnholtum gaf setrinu myndir af Kolfinni frá Kjarnholtum og Glókollu frá Kjarnholtum. Bjarni Þorkelsson færði setrinu að gjöf bókina "Æviskeið: Starfssaga Þorkels Bjarnasonar hrossaræktarráðunautar". Karl Bjarnason sútari á Sauðárkróki lánaði og gaf fjölda skinna og hrosshúða til setursins. Þá lánaði, Erling Sigurðsson, sonur Sigurðar Ólafssonar söngvara, setrinu gripi úr eigu föður síns sem átti m.a. Glettu frá Þorgautsstöðum og setti á henni Íslandsmet í 250m skeiði, en metið stóð í 28 ár.
Móttökurnar voru framar vonum og þökkum við öllum gestum opnunarinnar kærlega fyrir komuna! Þá viljum við koma sérstökum þökkum á framfæri til allra sem lögðu hönd á plóg við uppsetningu sýningarinnar, lánuðu setrinu gripi til sýningargerðarinnar eða færðu setrinu gjafir. Framlag ykkar skiptir sköpum.
Setrið er nú opið alla daga kl. 10-16 nema mánudaga (þegar er lokað) til og með 30. ágúst.
